TVG-MANIOTAS con Xose Piñeiro do ¨COMPOSTELA ESGRIMA

Achegar os valores e beneficios da práctica deportiva aos espectadores mediante o coñecemento dos seus protagonistas é o obxectivo da nova serie documental “MANIOTAS”, un espazo educativo e entretido dirixido a toda a familia para transmitir o importante papel que o deporte e a relación entre as persoas teñen na sociedade. A serie documental proporciona unha visión cotiá do mundo que envolve o deporte reflectindo situacións tanto divertidas coma emotivas. 

Pero, quen son os protagonistas destas historias? Persoas de todas as idades relacionadas dalgún xeito con algunha disciplina deportiva, desde as máis populares e modestas ás máis orixinais; colectivos ou individuos que ofrecerán aos telespectadores a oportunidade de coñecer as situacións máis curiosas, emotivas e sorprendentes e, como non, xente amiga de mover as pernas e o corazón. 

Foto de Ainoa Calvo

 A primeira historia de hoxe terán como protagonista a Marta Míguez, unha das ilustres galegas olímpicas, que chegou a competir na olimpíada de Sydney no ano 2000 lanzando xavelina, e que agora poderemos ver como combina a súa paixón deportiva coa súa faceta de nai de tres fillos. 

 Na segunda historia coñeceremos a José Piñeiro, un dos máis reputados profesores de esgrima de Santiago, que intenta que esta disciplina sexa un dos deportes máis populares do campus da USC onde José imparte clases.